क्षमताभन्दा ५ गुणा बढी बन्दीः विराटनगर बालसुधार गृहमा हिंसात्मक झडप, प्रहरी हवल्दार घाइते

विराटनगर २८ श्रावण । विराटनगरस्थित बालसुधार गृह बुधबार दिउँसो तनावग्रस्त बनेको छ। क्षमताभन्दा करिब ५ गुणा बढी बन्दी राखिएको उक्त सुधार गृहमा दुई समूहमा विभाजित बालकहरूबीच हिंसात्मक झडप हुँदा स्थिति नियन्त्रणमा लिने क्रममा एकजना वरिष्ठ प्रहरी हवल्दार घाइते भएका छन्। जिल्ला प्रहरी कार्यालय मोरङका अनुसार विराटनगर–३ मा रहेको सुधार गृहभित्र रहेका बालकहरूबीच समूह बनाएर झगडा सुरु भएको थियो। झगडाले उग्र रूप लिएपछि नियन्त्रणका लागि खटिएका वरिष्ठ प्रहरी हवल्दार हिरन कुमार मण्डल घाइते भएको मोरङ प्रहरी प्रवक्ता, डीएसपी हस्तबहादुर सुनारले जानकारी दिनुभयो। घटनाको गम्भीरतालाई मध्यनजर गर्दै मोरङ प्रहरी प्रमुख एसपी नारायणप्रसाद चिमरिया स्वयं घटनास्थलमा पुग्नु भएको थियो । थप घटना हुन नदिन ठूलो संख्यामा प्रहरी परिचालन गरी स्थिति नियन्त्रणमा लिइएको छ। दुई समूहबीच झडप भएको बुझिएको छ। अहिले सुधार गृहमा रहेका बालकहरूलाई भित्र राखिएको र अवस्था सामान्य रहेको एसपी चिमरियाले भन्नुभयो।

यो झडपको मुख्य कारण सुधार गृहमा रहेको चरम अव्यवस्था र क्षमताभन्दा अत्यधिक बढी बन्दी हुनुलाई मानिएको छ। जम्मा ५० जनाको क्षमता रहेको उक्त बालसुधार गृहमा हाल २४९ जना बालकहरूलाई राखिएको छ, जुन क्षमताभन्दा लगभग पाँच गुणा बढी हो। अदालतबाट विभिन्न कसुरमा दोषी ठहर भएका १८ वर्ष मुनिका बालबालिकालाई सुधारका लागि राखिने यस्तो गृहमा अत्यधिक चापका कारण पटक पटक यस्ता घटना हुने गरेका छन्। यसैबीच, जिल्ला प्रशासन कार्यालय मोरङले झडपपछि सुधार गृहमा रहेका सबै २४९ जना बाल बिज्याइँकर्ताहरू सुरक्षित र सुधार गृहमै मौजूद रहेको पुष्टि गरेको छ। घटनापछि कुनै पनि बालक भाग्न सफल नभएको प्रशासनले जनाएको छ। प्रहरीले घटनाबारे थप अनुसन्धान गरिरहेको छ।