स्पेन विश्वविजेता, मेस्सीको अन्तिम सपना अधुरै

विराटनगर, ४श्रावण । तनावपूर्ण र रोमाञ्चक फाइनलमा अतिरिक्त समयको निर्णायक गोलसँगै स्पेनले अर्जेन्टिनालाई १–० ले पराजित गर्दै फिफा विश्वकप फुटबलको उपाधि जितेको छ। निर्णायक खेलको १०६औँ मिनेटमा बार्सिलोनाका फरवार्ड फेरान टोरेसले गरेको गोल नै स्पेनलाई दोस्रो विश्वकप उपाधि दिलाउन पर्याप्त बन्यो। खेलको ६२औँ मिनेटमा मिकेल ओयार्जाबलको स्थानमा मैदान प्रवेश गरेका टोरेसले निको विलियम्सले हेडमार्फत मिलाइदिएको बललाई नजिकैबाट जाली चुमाउँदै स्पेनको ऐतिहासिक जित सुनिश्चित गरेका हुन्। उक्त अवसर पेड्रो पोरोको उत्कृष्ट क्रसबाट सिर्जना भएको थियो।

उपाधि जितेपछि भावुक बनेका टोरेसले भने, यो गोल मेरो मात्र होइन, ४ करोड ७० लाख स्पेनी नागरिकहरूको हो। फाइनलको अन्त्यतिर अर्जेन्टिना १० खेलाडीमा सीमित बनेको थियो। खेलको ९०औँ मिनेटमा पाउ कुबारसीमाथि खतरनाक फाउल गरेपछि मिडफिल्डर एन्जो फर्नान्डेजले दोस्रो पहेँलो कार्डसहित रातो कार्ड पाए। त्यसपछि अर्जेन्टिनाले खेलमा पुनरागमन गर्ने सम्भावना झन् कमजोर बन्यो। अन्तिम सिट्टीसँगै मैदानमा दुवै टोलीका खेलाडीबीच सामान्य झडपसमेत भएको थियो। सो क्रममा अर्जेन्टिनाका लिआन्ड्रो पारेडेसले पनि रातो कार्ड बेहोरे। पूरै खेलभर स्पेनले दबाब कायम राखे पनि अर्जेन्टिनाका गोलरक्षक एमिलियानो मार्टिनेज उत्कृष्ट प्रदर्शनमा देखिए। उनले ११ वटा महत्वपूर्ण बचाउ गर्दै टोलीलाई लामो समयसम्म खेलमा जीवित राखे। यो विश्वकप फाइनलमा कुनै गोलकिपरले गरेको सर्वाधिक सेभ हो।अर्जेन्टिना भने आक्रमणमा निकै फितलो देखियो। टोलीले खेलको ११७औँ मिनेटमा लियोनेल मेस्सीको प्रहारपछि मात्र पहिलो पटक गोलतर्फ प्रभावकारी प्रयास गर्न सकेको थियो।

मेस्सीको अन्तिम विश्वकप सपना अधुरै

३९ वर्षीय लियोनेल मेस्सी लगातार तीन विश्वकप फाइनलको सुरुआती टोलीमा स्थान बनाउने पहिलो पुरुष खेलाडी बने। उनले प्रतियोगिताभर आठ गोल गरे पनि गोल्डेन बुट जित्न सकेनन्। फ्रान्सका किलियन एम्बाप्पेभन्दा उनी दुई गोलले पछि परे। विश्वकप इतिहासमा २१ गोल गरेका मेस्सीले सम्भवतः आफ्नो विश्वकप करियर यही फाइनलसँग टुंग्याएका छन्। आठ पटकका बालोन डीुओर विजेताका लागि दोस्रो लगातार विश्वकप उपाधिको सपना पनि यससँगै चकनाचुर भएको छ।
 स्पेनको ऐतिहासिक उपलब्धि

२०१० पछि १६ वर्षको अन्तरालमा स्पेनले दोस्रो पटक विश्वकप ट्रफी उचाल्न सफल भयो। प्रशिक्षक लुइस डे ला फुएन्तेको नेतृत्वमा स्पेनले प्रतियोगिताभर उत्कृष्ट र अनुशासित प्रदर्शन गर्दै केवल एक गोल मात्र व्यहोरेको थियो। उपाधिसँगै स्पेनको अपराजित यात्रा सबै प्रतियोगिता गरी ३८ खेल पुगेको छ। यसले इटालीको राष्ट्रिय टोलीले सन् २०१८ देखि २०२१ सम्म बनाएको सर्वाधिक लामो अपराजित यात्राको कीर्तिमान पनि तोडेको छ। उपाधिपछि डे ला फुएन्तेले भने, हामी विश्व च्याम्पियन बनेका छौँ। यो सफलता हाम्रो एकता, विश्वास र सामूहिक मेहनतको परिणाम हो। स्पेन लगातार युरोपेली च्याम्पियन बनेपछि विश्वकप जित्ने इतिहास रच्ने तेस्रो टोलीसमेत बनेको छ।

भव्य फाइनल, विश्वकै चर्चित अनुहारहरूको उपस्थिति

अमेरिका, क्यानडा र मेक्सिकोमा संयुक्त रूपमा आयोजित ४८ टोली सहभागी विश्वकपको १०४औँ तथा अन्तिम खेल विश्व फुटबल इतिहासकै सबैभन्दा भव्य फाइनलमध्ये एक बन्यो। फाइनल हेर्न हलिउडका कलाकार ब्राड पिट, टम क्रुज र म्याट डेमन, एनबीएका स्टार स्टेफन करी, केभिन डुरान्ट, भिक्टर वेम्बान्यामालगायतका खेलाडी, टेनिसका सेरेना विलियम्स र कार्लोस अल्काराज, फुटबलका महान् हस्ती डेभिड बेकह्याम, जिनेदिन जिदान, डिडियर ड्रोग्बा, काका लगायत उपस्थित थिए। समापन समारोहमा पोस्ट मालोन मुख्य आकर्षण बने भने फिफाको इतिहासमै पहिलो पटक आयोजना गरिएको हाफटाइम शोमा जस्टिन बिबर, म्याडोना, शाकिरा, बीटीएस, बर्ना बोय, कोल्डप्ले र अन्य विश्वप्रसिद्ध कलाकारहरूको प्रस्तुति रहेको थियो। खेलपछि अमेरिकी राष्ट्रपति डोनाल्ड ट्रम्पले विजेता स्पेनलाई विश्वकप ट्रफी हस्तान्तरण गरेका थिए।