एनपीएलको नयाँ सिजनमा विराटनगर किंग्सको नयाँ जर्सी

विराटनगर,२३ कार्तिक । एनपीएलको नयाँ सिजनका लागि विराटनगर किंग्सले आफ्नो नयाँ जर्सी सार्वजनिक गरेको छ । यो जर्सीले कोशी प्रदेशको गौरव, शक्ति र समुदायको भावना झल्काएको क्लबले जनाएको छ । क्लबका अनुसार जर्सीका हरेक विवरणमा हाम्रा विश्वास, संस्कार र विराटनगरको अविचलित भावनाको अर्थ, उद्देश्य र पहिचान समाहित गरिएको छ । ‘डिजाइनको केन्द्रमा सप्तकोशीको प्रवाह समेट्ने सात रेखाहरू रहेका छन् । यी सात रेखाहरू विशाल सप्तकोशी नदी बन्न एकसाथ मिसिने सातवटा शाखा नदीहरूका प्रतीक हुन् । यी रेखाहरूले एकता, शक्ति र गतिशीलतालाई जनाउँछन् । प्रत्येक नदीको आ–आफ्नै ऊर्जा हुन्छ, तर सबै नदीहरू एकसाथ बग्दा तिनीहरू एक अजेय शक्तिमा रूपान्तरित हुन्छन् । विराटनगर किंग्सको खेल पनि मैदानमा ठीक त्यस्तै हुन्छ । सात नदी । एउटै लय । एकै धड्कन ।’ टिम व्यवस्थापनले भनेको छ । जर्सीको काँधमा काँधको साहस अर्थात् एपाउलेट रहेको छ, जसले नेतृत्व र गर्वको संकेत गर्दछ । यो मौन रहन्छ र आदेश होइन, प्रेरणा दिन्छ । ‘यो जर्सी लगाउने प्रत्येक खेलाडीले आफ्नो शहरको सपना र नेतृत्वको जिम्मेवारी बोकेको हुन्छ । किंग्स केवल खेल्दैनन्, चाहे जस्तोसुकै चुनौती अओस्, उनीहरू बेपर्वाह भएर साहस, दृढता र विश्वासको प्रतिनिधित्व गर्छन् ।’ क्लबले भनेको छ । टोलीले दोस्रो संस्करणको लागि न्युजिल्यान्डका ब्याटर मार्टिन गप्टिल, दक्षिण अफ्रिकाका फाफ डुप्लेसिस र मार्चन्ट डी लिग्ने, अस्ट्रेलियाका साम हिजलेट र स्कटल्यान्डका जर्ज मुन्सेलाई अनुबन्ध गरेको छ । विराटनगरले सन्दीपसहित लोकेश बम, प्रतिश जिसी, बसिर अहमद, नरेन भट्ट र सुवास भण्डारीलाई रिटेन गरेको थियो । यसैगरी, टोलीले मिनी अक्सनबाट सूर्य तामाङ, साहिल पटेल, नारायण जोशी, श्रवण किस्कु र शंकर रानालाई अनुबन्ध गरेको हो । नेपाल क्रिकेट संघ (क्यान)ले आयोजना गर्ने लिगमा विराटनगरसहित साबिक विजेता जनकपुर बोल्ट्स, साबिक उपविजेता सुदूरपश्चिम रोयल्स, कर्णाली याक्स, पोखरा एभेन्जर्स, चितवन राइनोज, काठमाडौं गोर्खाज र लुम्बिनी लायन्स छन् । प्रतियोगिता मंसिर १ देखि २७ सम्म हुँदै छ ।