पत्रकार महासंघ मोरङले तीज कार्यक्रमको खर्च भोटेकोशी बाढी प्रभावितलाई दिने

विराटनगर, २१ भाद्र । नेपाल पत्रकार महासंघ मोरङले यसवर्ष हरितालिका तीजका अवसरमा आयोजना गरेको कार्यक्रमको व्यवस्थापनमा लाग्ने खर्च रकम भोटेकोशी बाढी पीडितका लागि राहत कोषमा जम्मा गर्ने निर्णय गरेको छ ।
महासंघ मोरङले हरेक वर्ष हरितालिका तीजको अवसरमा पत्रकारहरुबीच आपसी सद्भाव, भेटघाट र शुभकामना आदानप्रदान गर्ने उद्देश्यले तीज कार्यक्रम आयोजना गर्दै आएको छ । यसवर्ष भने महासंघले तीज कार्यक्रमलाई सामान्य रुपमा मनाएको जनाएको छ ।
महासंघ मोरङकी अध्यक्ष सुशीला पाठकका अनुसार तीज कार्यक्रमकालागि व्यवस्थापनमा हुने खर्च कटौती गरी सो रकम विपदबाट प्रभावितकालागि राहत कोषमा सहयोग गर्ने निर्णय गरिएको हो ।
चाडपर्व मनाउने क्रममा हुने अनावश्यक खर्चलाई विपद् प्रभावितको सहयोगमा प्रयोग गर्न सकिने सन्देश दिन पनि महासंघले यस्तो निर्णय गरेको अध्यक्ष पाठकले बताउनुभयो । पत्रकार महासंघले सञ्चार क्षेत्रसँगै सामाजिक उत्तरदायित्व निर्वाह गर्नुपर्ने भएकाले विपद्को समयमा पीडितको साथमा उभिनु आवश्यक रहेको उहाँको भनाइ छ । महासंघको यो निर्णयले चाडपर्वका नाममा हुने खर्चलाई विपद् पीडितको राहतमा प्रयोग गर्ने सकारात्मक अभ्यासको सन्देश दिएको छ ।
कार्यक्रममा महासंघ मोरङका पूर्व अध्यक्षसमेत रहनुभएका कोशी प्रदेश सञ्चार प्रतिष्ठानका अध्यक्ष दीपक दाहाल, नेपाल पत्रकार महासंघका केन्द्रीय सदस्य कमल रिमाल, प्रदेश उपाध्यक्ष कुमोद अधिकारी, प्रदेश महासचिव हिमा चेम्जोङ, महासंघ मोरङका निवर्तमान अध्यक्ष सञ्जीव खनाल, पूर्वअध्यक्षहरु मोहन भण्डारी, यज्ञ शर्मा, विक्रम निरौला, महेन्द्र विष्ट, बन्धु पोखरेललगायतका ६० जना भन्दा बढी पत्रकारहरुको सहभागीता रहेको थियो ।