विश्वकपमा चलेनन् क्रिस्टियानो रोनाल्डो, कंगोसँगको खेलमा २५ पटक मात्र बल छोए

विराटनगर, ४ असार । विश्वकप २०२६ मा फुटबलका तीन सुपरस्टारले आफ्नो जादु देखाएका छन्, तर पोर्चुगलका कप्तान क्रिस्टियानो रोनाल्डो भने आलोचकहरूको निशानामा परेका छन्।

मंगलबार किलियन एम्बापेले सेनेगलविरुद्ध दुई गोल गर्दै फ्रान्सका लागि सर्वाधिक गोलकर्ता बने। त्यसपछि नर्वेका एर्लिङ हालान्डले इराकविरुद्धको जितमा दुई गोल गर्दै आफ्नो विश्वकप डेब्यु लाई सम्झनलायक बनाए। लियोनेल मेस्सी भने सबैभन्दा उत्कृष्ट देखिए । अल्जेरियाविरुद्ध ह्याट्रिक गर्दै उनी जर्मनीका मिरोस्लाभ क्लोजेसँगै विश्वकप इतिहासको सर्वाधिक गोलकर्ता सूचीमा संयुक्त शीर्षमा पुगे।

तर बुधबार रोनाल्डोका लागि यो अवसर सहज भएन। पोर्चुगलले डीआर कंगोसँग १ १ गोलले बराबरी खेल्दा रोनाल्डोले खेलमा प्रभाव जमाउन संघर्ष गर्नुपर्‍यो, र लगातार छैटौँ विश्वकपमा गोल गर्ने इतिहास रच्ने अवसरबाट चुके। प्रिमियर लिगका पूर्वस्ट्राइकर क्रिस सटनले प्रशिक्षक रोबर्टो मार्टिनेजको रणनीतिको आलोचना गर्दै ४१ वर्षीय रोनाल्डोलाई पूरै खेल मैदानमा राखेकामा असन्तुष्टि जनाएका छन्। उनका अनुसार मार्टिनेज रोनाल्डोलाई बाहिर निकाल्न नसक्ने अवस्थामा छन्। इंग्ल्यान्डका पूर्वकप्तान वेन रुनीले भने रोनाल्डोलाई अझै राम्रा अवसरको खाँचो रहेको बताए।

बीबीसीका विश्लेषक गाएल क्लिसी र ओलिभियर जिरुले फ्रान्सिस्को कोन्सेइसनले रोनाल्डोलाई पास दिनुको साटो आफैँ प्रहार गरेको भए गोल हुने सम्भावना बढी हुने धारणा राखे। फ्रान्सका पूर्वस्टार थियरी हेनरीले रोनाल्डोको कुदाइको शैलीले ब्रुनो फर्नान्डेससम्म पुग्ने सम्भावित पास रोकिएको औँल्याए। क्लिसीले रोनाल्डोको सुपरस्टार उपस्थितिले अञ्जानमै सहखेलाडीहरूको स्वतन्त्रता र अवसरमा असर पुर्‍याइरहेको हुनसक्ने विचार राखेका छन्।

कंगोसँगको खेल अवधिभर २५ पटक मात्र बल छोए

पोर्चुगलका भेट्रान कप्तान रोनाल्डोले फिफा विश्वकप २०२६ को आफ्नो पहिलो खेलमा निराशाजनक प्रदर्शन गरे । अफ्रिकी राष्ट्र डिआर कंगोसँग १ १ गोलको अप्रत्याशित बराबरीमा टुंगिएको खेल अवधिभर रोनाल्डोले जम्मा २५ पटक मात्र बल छुन सकेका थिए। विश्व फुटबलका महान् फरवार्डका रूपमा स्थापित रोनाल्डोको यो सक्रियता उनको समग्र विश्वकप करिअरकै सबैभन्दा कमजोर र सीमित प्रदर्शनमध्ये एक मानिएको छ। खेलभर डिआर कंगोको रक्षापंक्तिले रोनाल्डोलाई कडा निगरानीमा राख्दै पूर्ण रूपमा निस्प्रभावी बनाएको थियो।

खेल विश्लेषक संस्था ईएसपीएन एफसीका अनुसार ९० मिनेटको खेलमा रोनाल्डोले विपक्षी गोलपोष्टलाई लक्षित गरी तीन पटक प्रहार गरे पनि उनका कुनै पनि प्रहार ‘अन टार्गेट’ हुन सकेनन्। मैदानमा उनको फिक्का उपस्थिति र सिमित सहभागिताका कारण पोर्चुगलको अग्रपंक्तिको धार नै भुत्ते देखिएको थियो। विपक्षी रक्षकहरूको रणनीतिक घेराबन्दीमा परेपछि रोनाल्डोले खेलमा आफ्नो स्वभाविक प्रभाव जमाउन सकेनन्। खेलको सुरुआत भने पोर्चुगलका लागि सुखद रहेको थियो। खेल सुरु भएको छैटौँ मिनेटमा नै जोआओ नेभेसले गोल गर्दै पोर्चुगललाई सुरुवाती अग्रता दिलाएका थिए। तर, खेलमा बलियो पुनरागमन गरेको डिआर कंगोले पहिलो हाफको इन्जुरी समयमा बराबरी गोल फर्कायो। कङ्गोका स्ट्राइकर योआन विस्साले उत्कृष्ट गोल गर्दै खेललाई १-१ को रोमाञ्चक अवस्थामा पुर्‍याए। दोस्रो हाफमा पोर्चुगलले खेल आफ्नो पक्षमा पार्न केही कडा अवसरहरू सिर्जना गरे पनि कंगोको बलियो रक्षापंक्ति र फितलो फिनिसिङका कारण थप गोल हुन सकेन। अन्ततः उपाधि दाबेदार मानिएको पोर्चुगलले तुलनात्मक रूपमा कमजोर प्रतिद्वन्द्वीसँग अंक बाँड्दै प्रतियोगिताको सुरुआत गर्नुपरेको छ। यस खेलको नतिजासँगै रोनाल्डोका नाममा एउटा बिर्सनलाग्दो कीर्तिमान थपिएको छ, जहाँ उनी प्रमुख अन्तर्राष्ट्रिय प्रतियोगिताहरूमा लगातार १० खेलसम्म गोलविहीन बन्न पुगेका छन्। अर्कोतर्फ, सन् १९७४ पछि पहिलो पटक विश्वकपको मञ्चमा फर्किएको डिआर कंगोका लागि भने बलियो पोर्चुगललाई बराबरीमा रोक्नु ऐतिहासिक जित सरह सावित भएको छ।