एसईईमा उत्तीर्ण हुने विद्यार्थी र तिनका अभिभावकलाई एभरेष्टको सम्मान

विराटनगर, १७ अषाढ । विराटनगरस्थित एभरेष्ट बोर्डिङ स्कुलले यसवर्षको माध्यमिक शिक्षा परीक्षा (एसईई) मा उत्तीर्ण हुने एकसय ७१ जना विद्यार्थी र उनीहरूका अभिभावकलाई सम्मान गरेको छ । विराटनगरमा आज आयोजित कार्यक्रममा विद्यालयले आफ्ना सफल विद्यार्थीहरूको उपलब्धिलाई सम्मान गर्दै उनीहरूका अभिभावकहरूलाई पनि धन्यवाद ज्ञापन गरेको हो ।
एभरेष्ट स्कुलका दुई विद्यार्थी प्रेम खतिवडा र कृति गोयलले पूर्ण ४.० जीपीए हासिल गर्न सफल भएका छन् भने परीक्षामा सहभागी कुल एकसय ७१ जना सबै विद्यार्थी उत्तीर्ण भएका छन् । यी मध्ये एकसय ३३ जनाले ३.६१ देखि ४.० सम्मको उच्च जीपीए प्राप्त गरेका छन् भने बाँकी ३८ जनाले ३.२१ देखि ३.६० सम्मको जीपीए हासिल गरेका छन् ।
कार्यक्रममा बोल्दै विद्यालयका प्रिन्सिपल टिकाराम पुरीले एभरेष्ट बोर्डिङ स्कुलको शैक्षिक परम्परा र उपलब्धिहरूको विस्तृत चर्चा गर्नुभयो । एभरेष्ट स्कुलले विगत तीन वर्षदेखि एसईई उत्तीर्ण हुने विद्यार्थी र अभिभावकलाई सम्मान गर्दै आएको बताउनुभयो । २०५७ सालदेखि एसएसली (हाल एसईई) परीक्षामा सहभागिता जनाउंदै आएको बताउदै उहाँले त्यसयता आफ्ना बिद्यार्थीले  निरन्तर उत्कृष्ट परिणाम ल्याउँदै आएको बताउनुभयो । विद्यार्थीले ४ जीपीए नै ल्याउनुपर्छ भन्ने कुरा नभएर महत्त्वपूर्ण कुरा गुणस्तरीय शिक्षा हासिल गर्नु रहेको उहाँको भनाइ छ।
कार्यक्रमका प्रमुख अतिथि जिल्ला शिक्षा समन्वय इकाइ मोरङका प्रमुख जीवन गड्तौलाले एसईईमा उत्तीर्ण हुने सबै विद्यार्थीलाई सफलताको शुभकामना दिनुभयो । उहाँले विद्यार्थीहरूको उपलब्धिको प्रशंसा गर्दै भविष्यमा पनि यस्तै सफलता प्राप्त गर्न प्रेरणा दिनुभयो ।