NOTIFICATIONS
हाम्रो पेज
धरान, ३ अषाढ I धरान उपमहानगरपालिकामा मेयर हर्क साम्पाङ र उपमेयर आइन्द्रविक्रम बेघाबीचको विवादले उग्र रूप लिएको छ, जसले पूरै धरानलाई तनावग्रस्त बनाएको छ। ‘जनश्रमदान’ मार्फत गरिएको कामको भुक्तानीका लागि ‘डोर हाजिरी’ सहितको बिल पेस भएपछि सुरु भएको यो विवाद अहिले हातपातको प्रयास, नाराबाजी र समर्थकहरूबीचको झडपको अवस्थामा पुगेको छ।
मेयर साम्पाङको तर्क छ, “बस्ती जोगाउन आपत्कालीन अवस्थामा जनताको घर बचाउन काम गरिएको हो। १७ लाखको काम श्रमदानमार्फत ७ लाखमा सकिएको छ। तर, उपमेयरले विकासमा अवरोध गरिरहनुभएको छ।” उहाँले डोर हाजिरी केवल रेकर्डका लागि मात्र राखिएको र विरोधीहरूले अफवाह फैलाएको दाबी गर्नुभएको छ । उपमेयर बेघाका अनुशार, पहिले नै सकिएको कामलाई कानुनविपरीत निकासाका लागि दबाब दिइयो। श्रमदानको नाममा समर्थकलाई डोर हाजिरीमा काम लगाएर भुक्तानी माग्ने कामको म समर्थन गर्न सक्दिनँ, उहाँले भन्नुभये । उहाँले अनुगमन प्रतिवेदन दिन अस्वीकार गर्नुभएको छ । किनकि भुक्तानी प्रक्रियामा उपमेयरको अनुगमन प्रतिवेदन अनिवार्य हुन्छ।
दुवै पक्षका समर्थकहरू आमनेसामने भएर नाराबाजी गर्न थालेपछि स्थिति झडप उन्मुख बनेको थियो। मेयर पक्षले ‘विकासविरोधी उपमेयर चाहिँदैन’ भन्दै नारा लगायो भने माओवादी कार्यकर्ताले ‘हर्क साम्पाङ मुर्दावाद, गैरकानुनी काममा राज्यको दोहन गर्न पाइँदैन’ भन्दै प्रतिवाद गरे। स्थिति नियन्त्रणबाहिर जान नदिन ठूलो संख्यामा नेपाल प्रहरी र सशस्त्र प्रहरी परिचालन गरिएको थियो।
