मनसुन सक्रियः देशभर बाढी, पहिरोको जोखिम, यी जिल्लाहरूमा उच्च सतर्कता अपनाउन आग्रह

काठमाडौँ १५ श्रावण । देशभर मनसुन सक्रिय भएसँगै अबका तीन दिन सानाठूला नदीहरूमा पानीको बहाव उल्लेख्य बढ्ने पूर्वानुमान गरिएको छ। बाढी पूर्वानुमान महाशाखाले नदीतटीय क्षेत्र र पहिरोको जोखिम भएका ठाउँहरूमा उच्च सतर्कता अपनाउन विशेष आग्रह गरेको छ। बिहीबार बिहानैदेखि देशका विभिन्न स्थानमा वर्षा भइरहेको छ भने काठमाडौँ उपत्यकामा पनि अविरल वर्षा जारी छ। महाशाखाका अनुसार विशेषगरी केही जिल्लाहरूमा आकस्मिक बाढीको जोखिम उच्च रहेको छ । दोलखा र सिन्धुपाल्चोक भई बहने साना नदीहरूमा आकस्मिक बाढीको ‘मध्यम’ जोखिमको ‘उच्च’ सम्भावना रहेको छ। यस्तै ओखलढुंगा, रामेछाप, रसुवा, धादिङ, नुवाकोट, मकवानपुर, काभ्रेपलाञ्चोक, जाजरकोट, दैलेख, सुर्खेत, अछाम, लमजुङ, रुकुम पश्चिम, जुम्ला, दार्चुला, बैतडी, डडेलधुरा र काठमाडौँ उपत्यका काठमाडौं, ललितपुर, भक्तपुर भई बहने साना नदीहरूमा पनि बहाव बढ्ने र बाढीको मध्यम जोखिम रहने अनुमान छ। यद्यपि, बिहीबार बिहानको मापनअनुसार कोशी, नारायणी, कर्णाली, महाकाली जस्ता ठूला नदीहरूको जलसतह सतर्कता तहभन्दा तलै रहेको छ।

वर्षाका कारण ठाउँ ठाउँमा पहिरो जान थालेको छ। म्याग्दीको अन्नपूर्ण गाउँपालिका–३, सुकेबगरमा आज बिहान ५ बजेतिर लेदो माटोसहितको पहिरो खस्दा बेनी–जोमसोम सडकखण्ड पूर्णरूपमा अवरुद्ध भएको छ। सडक अवरुद्ध हुँदा सवारीसाधन र यात्रुहरू प्रभावित भएका छन्। जल तथा मौसम विज्ञान विभागका अनुसार हाल मनसुनको न्यूनचापीय रेखा सरदर स्थानमा रहेकाले देशभर मनसुनी वायुको प्रभाव छ। बिहीबार दिउँसो सुदूरपश्चिम प्रदेश लगायत देशका पहाडी भू भागका केही स्थानमा र लुम्बिनी प्रदेशका तराई भू भागका थोरै स्थानमा मेघगर्जन र चट्याङसहित मध्यम वर्षाको सम्भावना छ। विशेषगरी बागमती र गण्डकी प्रदेशका पहाडी भू भागका एक दुई स्थानमा भारी वर्षा को पनि सम्भावना छ। बिहीबार राति मधेश प्रदेश र सुदूरपश्चिम प्रदेश लगायत देशका पहाडी भू भागका थोरै स्थानमा मध्यम वर्षाको सम्भावना छ। महाशाखाले वर्षाका कारण नदीको जलस्तर बढ्ने, पहिरो जाने, सडक यातायात प्रभावित हुने तथा कृषिमा समेत असर पर्नसक्ने भन्दै सबैलाई आवश्यक सावधानी अपनाउन र अद्यावधिक सूचनामा ध्यान दिन अनुरोध गरेको छ।