एभरेष्ट स्कूलका शिक्षक तथा कर्मचारीलाई एआई तालिम

समयानुकूल प्रविधिको प्रयोग गर्दै विद्यार्थीलाई थप प्रभावकारी ढंगबाट अध्यापन गराउने उद्देश्यले विद्यालयले तालिम आयोजना गरेको हो। शुक्रबार भएको तालिममा प्ले ग्रुपदेखि कक्षा १२ सम्म अध्यापन गराउने एकसय ५० जना शिक्षक–शिक्षीका तथा कर्मचारीहरूको सहभागिता थियो। कम्प्युटर शिक्षाका विभिन्न कोर्स सञ्चालन गर्दै आएको एभरेष्टले कक्षा ३ देखिनै बेलायतको डिजी स्कुलको एनसीसी कोर्ससमेत सञ्चालन गर्दै आएको छ। प्रविधिमा भइरहेको तीव्र विकाससँगै शिक्षण सिकाइलाई थप प्रभावकारी बनाउन एआईका विभिन्न टुल्सको प्रयोगसम्बन्धी सीप प्रदान गरिएको हो।

तालिममा सहभागी शिक्षिका सुस्मिता कोइरालाले एआईका केही टुल्स आफूहरूले यसअघि पनि प्रयोग गर्दै आएपनि तालिमका क्रममा नयाँ टुल्स र तिनको प्रयोगबारे जानकारी प्राप्त भएको बताउनुभयो । एआईको प्रयोगबाट पाठ्यक्रममा समेटिएका विषयलाई विभिन्न परियोजना तथा सामग्रीका रूपमा तयार गरी विद्यार्थीलाई बुझाउन सहज हुने उहाँको भनाइ छ। त्यस्तै, शिक्षिका एलिसा अधिकारीले एआई तालिमले दैनिक अध्यापनलाई अझ प्रभावकारी बनाउन सहयोग पुग्ने बताउनुभयो । उहाँले तालिमका क्रममा आफूले धेरै नयाँ कुरा सिक्ने अवसर पाएको बताउनुभयो । विद्यालयका भाइस प्रिन्सिपल कुन्दन पुरीले शिक्षकलाई लेसन प्लान तयार गर्नेदेखि त्यसको प्रभावकारी कार्यान्वयनसम्म एआईको प्रयोग उपयोगी हुने विश्वास ब्यक्त गर्नुभयो । युगसापेक्ष प्रविधिको अधिकतम प्रयोग गर्दै शिक्षण सिकाइलाई प्रभावकारी बनाउने उद्देश्यले तालिम सञ्चालन गरिएको उहाँको भनाइ छ।

तालिमको सहजीकरण माई सेकेण्ड टिचरका कप्युटर विज्ञान विज्ञ प्रतिक प्रधान नेतृत्वको १३ जनाको समूहले गरेको थियो I हरेक कक्षाकोठामा इन्टरनेट र प्रोजेक्टरको व्यवस्था गरी ल्यापटपमार्फत अध्यापन गराउँदै आएको एभरेष्टले आगामी शैक्षिक सत्रदेखि हरेक कक्षा कोठामा स्मार्ट बोर्ड जडान गरि अध्यापन गराउने तयारी गरेको छ । ‘आगामी शैक्षिक सत्रदेखि प्रत्येक कक्षाकोठामा स्मार्ट बोर्ड जडान गरिनेछ,’ प्रिन्सिपल टिकाराम पुरीले भन्नुभयो, ‘प्रविधिको विकाससँगै शिक्षण सिकाइलाई पनि प्रविधिमैत्री बनाउँदै लगिनेछ ।’