अर्थतन्त्र सबल बनाउन राजनीतिक दलबीच एकता आवश्यक: एमाले उपमहासचिव ज्ञवाली

विराटनगर, २७ श्रावण I नेकपा (एमाले) का उपमहासचिव प्रदीप ज्ञवालीले मुलुकको विकास र जनजीवनको उन्नतिका लागि राजनीतिक दलहरू एकताबद्ध हुनुपर्नेमा जोड दिनुभएको छ।
कृष्णप्रसाद सिग्देल स्मृति प्रतिष्ठानले मंगलबार विराटनगरमा गरेको १६ औं स्मृति सभा तथा पुरस्कार वितरण समारोहलाई सम्बोधन गर्दै एमाले उपमहासचिव ज्ञवालीले समृद्ध नेपालकालागि दलहरूको प्राथमिकता आर्थिक सबलीकरणमा केन्द्रित हुनुपर्ने बताउनुभयो । ज्ञवालीले नेपाल विकासमा पछाडि नरहेको दाबी गर्दै हाल ७७ जिल्लामा सडक सञ्जाल विस्तार, ९७ प्रतिशत विद्युत् तथा खानेपानी पहुँच र ९९ प्रतिशत बालबालिका विद्यालयमा पहुँच रहेको तथ्यांक प्रस्तुत गर्नुभयो । उहाँका अनुसार यही विकास क्रमका आधारमा आगामी सन् २०२६ मा नेपाल विकसित देशमा परिणत हुने सम्भावना प्रवल छ । ज्ञवालीले मधेश प्रदेशमा खेतीका लागि आकासे वर्षामा निर्भरता अन्त्य गर्न सुनकोशी डाइभर्सन निर्माण कार्य पूरा भएपछि एकलाख ८२ हजार बिघा जमिनमा सिंचाइ हुने बताउनुभयो । पूर्वमन्त्री समेत रहेका ज्ञवालीले जहिलेपनि निराशाजनक कुरा मात्र सम्प्रेषित गर्ने मिडियाको दृष्टिकोण बदल्नुपर्ने आवश्यकता रहेको समेत बताउनुभयो  । उहाँले मिडियाले मुलुकमा भएका विकास निर्माण सहितका सकारात्मक कुराहरुलाई प्राथमिकता नदिने तथा निराशाजक कुराहरु मात्र सम्प्रेषण गर्ने गरेको गुनासो गर्नुभयो । जहिलेपनि नकारात्मक कुराहरु मात्र मिडियाको प्राथमिकतामा पर्ने गरेका कारण मुलुकमा सबै कुरा खत्तम भयो जस्तो निराशाजनक अवस्था सृजना भएको र त्यही कारण युवा पुस्ता समेत बिदेशिने मनस्थितिमा पुग्ने गरेको उहाँको भनाइ थियो ।

कार्यक्रममा विराटनगर महानगरपालिकाका मेयर नागेश कोइरालाले सङ्घीयतापछि मुलुकले विकासमा फड्को मारेको चर्चा गर्नुभयो । कार्यक्रममा नेकपा (एमाले) का केन्द्रीय सल्लाहकार परिषद सदस्य विनोद ढकाल, समाजसेवी श्याम पौडेल, उद्योग संगठन मोरङका अध्यक्ष नन्दकिशोर राठीलगायतले स्वर्गीय सिग्देलको योगदानको चर्चा गर्नुभएको थियो I

प्रतिष्ठानकी अध्यक्ष सीता सिग्देलको अध्यक्षतामा सम्पन्न कार्यक्रममा युवा उद्यमी चेतन निरौला र महिला उद्यमी अम्बिता भण्डारीलाई सम्मान गरिएको थियो I यस्तै २१ हजार एकसय १५ नगद राशिको पुरस्कार नेपाल पत्रकार महासंघ मोरङका पूर्व अध्यक्ष महेन्द्र विष्टलाई प्सरदान गरियो I यसैगरि स्वर्गीय सिग्देलले अध्ययन गरेको सुनसरीको मधुवनस्थित जनता माध्यमिक विद्यालयबाट २०८० र २०८१ सालको एसईई मा उत्कृष्ट नतिजा ल्याउने विद्यार्थीद्वय पिंकीकुमारी स्वर्णकार र सुशीलकुमार खत्वेलाई जनही नगद एघार हजार एकसय एघार रुपैयाँसहित प्रसंसा पत्र प्रदान गरियो I विराटनगरका युवा व्यवसायी कृष्णप्रसाद सिग्देलको २०६६ साल श्रावण २७ गते हृदयघातका कारण निधन भएको थियो I त्यसयता उहाँको नाममा स्थापित यस प्रतिष्ठानले हरेक बर्ष पुरस्कार वितरण र सम्मान कार्यक्रम गर्दै आएको छ I