उद्योग संगठन मोरङमा नयाँ नेतृत्वः अध्यक्षमा नन्दकिशोर राठी, युवा उद्यमी प्रतिक राउत कार्यसमितिमा प्रवेश

विराटनगर, ३ अषाढ I उद्योग संगठन मोरङले सर्वसम्मत रूपमा नयाँ नेतृत्व पाएको छ। संगठनको ५२औं वार्षिक साधारण सभाले अनुभवी उद्योगी नन्दकिशोर राठीलाई अध्यक्षमा निर्वाचित गरेको छ भने युवा उद्यमी प्रतिक राउत कार्यसमिति सदस्यमा मनोनित हुनु भएको छ । यो नयाँ नेतृत्वले कोशी प्रदेशको औद्योगिक विकासमा नयाँ ऊर्जा थप्ने अपेक्षा गरिएको छ।
संगठनको नयाँ कार्यसमितिमा अध्यक्षमा निर्वाचित राठी यसअघि वरिष्ठ उपाध्यक्ष हुनुहुन्थ्यो । यस्तै वरिष्ठ उपाध्यक्षमा भोलेश्वर दुलाल, उपाध्यक्षहरूमा सुरेन्द्र गोल्छा प्रथम, विपिन काबरा द्वितीय र सुबोध कोइराला तृतीय , कोषाध्यक्षमा पारस लुनियाँ निर्वाचित हुनु भएको छ। कार्यसमिति सदस्यहरूमा दिपककुमार अग्रवाल, जयेन्द्रकुमार शर्मा, सन्तोषकुमार भगत, सिद्धार्थ काबरा, श्रृजन प्याकुरेल, उकेश अग्रवाल, सौरभ सारडा र विरेन्द्र राठी चयन हुनु भएको छ ।
नवनिर्वाचित अध्यक्ष राठीले आफ्नो अधिकार प्रयोग गर्दै कार्यसमितिको पहिलो बैठकबाट प्रतिक राउत, पारस गोल्छा र किरण व्यासलाई कार्यसमिति सदस्यमा मनोनीत गर्नुभएको हो। संगठनको विधानअनुसार, अध्यक्षले एक महिलासहित तीन जनालाई कार्यसमितिमा मनोनित गर्न पाउने व्यवस्था छ।
युवा उद्यमी प्रतिक राउतको प्रवेशः एक पुस्तान्तरणको संकेत
उद्योग संगठन मोरङमा युवा उद्यमी प्रतिक राउतको प्रवेशलाई अर्थपूर्ण रूपमा हेरिएको छ। विराटनगरको प्रतिष्ठित औद्योगिक घराना शिवम् अर्गनाइजेसन प्रा. लि. का निर्देशक राउतले एक दर्जनभन्दा बढी उद्योगको जिम्मेवारी सम्हालिरहनु भएको छ ।

उहाँ नेपाल उद्योग वाणिज्य महासंघ, कोशी प्रदेशका अध्यक्ष तथा वरिष्ठ उद्योगी राजेन्द्र राउतका जेठा छोरा हुनुहुन्छ । राजेन्द्र राउतले यसअघि मोरङ व्यापार संघको वरिष्ठ उपाध्यक्ष र नेपाल उद्योग वाणिज्य महासंघको केन्द्रीय सदस्य जस्ता महत्त्वपूर्ण जिम्मेवारी सफलतापूर्वक निर्वाह गरिसक्नुभएको छ। उहाँ अहिले नेपाल उद्योग वाणिज्य महासंघ, कोशी प्रदेशको अध्यक्ष हुनुहुन्छ । मनोनित भएपछि प्रतिक राउतले उद्योगीहरूका समस्यालाई तीनै तहको सरकारसमक्ष पुऱ्याएर समाधानका लागि क्रियाशील रहने प्रतिबद्धता व्यक्त गर्नुभएको छ । उहाँको आगमनले संगठनमा नयाँ सोच र युवा ऊर्जाको सञ्चार गर्ने विश्वास लिइएको छ।