धनपालथानमा रहेका धार्मिक तथा शैक्षिक संस्थाहरुको अध्ययन पुस्तक विमोचन

विराटनगर, ७ श्रावण । मोरङको धनपालथान गाउँपालिका क्षेत्रभित्र रहेका धार्मिक तथा शैक्षिक संस्थाहरुको अध्ययन पुस्तक विमोचन गरिएको छ ।
विराटनगरमा बुधबार गाउँपालिकाका अध्यक्ष जिवछ गच्छदार, उपाध्यक्ष नसिमा वानो र प्रमुख प्रशासकीय अधिकृत रिता खतिवडालगायतले पुस्तकको विमोचन गर्नुभएको हो ।
धनपालथान गाउँपालिकामा सातवटा वडा छन् । ती वडामा रहेका धार्मिक मठमन्दिर, मस्जिद र शिक्षण संस्थाको बारेमा अध्ययन गरेर तयार पारिएको पुस्तक सार्वजनिक गरिएको हो । पुस्तक विमोचन पछि बोल्दै गाउँपालिकाका अध्यक्ष जीवछ गच्छदारले यसक्षेत्रमा वसोवास गर्ने नागरिकको जीवनस्तर उकास्न तथा शिक्षा र स्वास्थ्य क्षेत्रमा उनीहरुको सहज पुहुँच पु¥याउन पुस्तक उपयोगी हुने बताउनुभयो । यस्तै गाउँपालिकाकी उपाध्यक्ष नसिमा वानो, प्रमुख प्रशासकीय अधिकृत रीता खतिवडा, पुस्तकका सम्पादक यज्ञ शर्मा, सदस्य रामलाल सुतिहार, नेपाल पत्रकार महासंघ कोशी प्रदेशका उपाध्यक्ष कुमोद अधिकारी, मोरङ अध्यक्ष सुशीला पाठक, प्रेस युनियन कोशी प्रदेश अध्यक्ष मीनकुमार नवोदित, प्रेस चौतारी मोरङकी अध्यक्ष चीन थापा, पुस्तक प्रकाशन समितिका सदस्यद्वय श्यामसुन्दर सुतिहार र उषा सरदारलगायतले धनपाल राजा एवं थानको महत्वको चर्चा गर्दै उक्त गाउँपालिकामा कुनैपनि शुभ कार्य गर्दा ग्रामथानमा गई आशिर्वाद लिनाले शुख शान्ति एवं समृद्धि हुने विश्वास रहेको चर्चा गरे ।

पुस्तक प्रकाशनकालागि अग्रज पत्रकार यज्ञ शर्माको संयोजकत्वमा वरिष्ठ अधिवक्ता प्रा.डा. रामलाल सुतिहार र सञ्चार श्रोत केन्द्र विराटनगरका संयोजक विरेन्द्र शर्मा सदस्य रहेको समिति गठन गरिएको थियो । संयोजक शर्माले पुस्तकको सम्पादन गर्नुभएको हो । पत्रकारहरु श्यामसुन्दर सुतिहार, पदम सरदार र उषा मण्डल पुस्तकको सम्पादन मण्डलको सदस्य रहनुभएको छ । दुईसय ५० पृष्ठ रहेको पुस्तक प्रकाश इन्भेष्टमेन्ट प्रा.लि. विराटनगरले प्रकाशन गरेको हो । पुस्तक पहिलो पटक पाँचसय प्रति प्रकाशित गरिएको छ । पुस्तक प्रकाशन गर्न चारलाख ८३ हजार रुपैयाँ खर्च भएको जनाईएको छ ।