कोशी प्रदेश सदस्य भीम पराजुलीको छठ पर्वको अवसरमा २८औँ दण्डप्रणाम

पराजुली विगत ३५ वर्षदेखि निरन्तर छठ व्रत बस्दै आउनु भएको छ । दण्डप्रणाम क्रमको २८औं वर्ष हो । बौद्ध, किरातसहितको वैदिक सनातन हिन्दू धर्मप्रति आफ्नो गहिरो आस्था रहेको बताउँदै पराजुलीले हिन्दू धर्म विश्वकै सबैभन्दा प्राचीन धर्म भएको उल्लेख गर्नुभयो । विराटनगर महानगरपालिकाका मेयर रहँदासमेत उहाँले प्रत्येक वर्ष छठ पर्वमा यस्तै दण्डप्रणाम गर्दै आउनु भएको थियो । काग्रेसका केन्द्रीय सदस्य समेत रहनु भएका पराजुलीले सनातन हिन्दू राष्ट्रको वकालत गर्दै आउनु भएको छ । आज सूर्यको पूजा आराधना गरी छठ पर्व मनाइँदैछ । छठ पर्वको मुख्य दिन आज बेलुकी अस्ताउँदो सूर्यको पूजा आराधना गरी अर्घ्य दिइन्छ र भोलि बिहान उदाउँदो सूर्यलाई अर्घ्य दिएपछि छठ पर्व विधिपूर्वक समापन हुन्छ ।बिहानै स्नान गरी दिनभर निर्जल व्रत गरेका वर्तालुले बेलुकी अस्ताउँदो सूर्यलाई अघ्र्य दिने गर्छन् । कात्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको यो पर्व अस्ति शनिवारदेखि शुरू भएको हो । कात्तिक शुक्ल चतुर्थीका दिन स्नान गरी एक छाक खाने गरिन्छ । दोस्रो दिन सखर हालेर बनाइएको खीर (खरना) षष्ठी मातालाई चढाई बर्तालुले प्रसादस्वरुप खाने र नुन नखाई एक छाक फलाहार गरिन्छ । कात्तिक शुक्ल षष्ठीका दिन आज निराहार व्रत गरी बेलुकी अस्ताउँदो सूर्यलाई पूजा आराधना गरी अघ्र्य दिने गरिन्छ । आज रातभर जागा बसी भोलि सप्तमीका दिन बिहान उदाउँदो सूर्यलाई पूजा आराधना गरी विधिपूर्वक अघ्र्य दिएपछि यो पर्व समापन हुन्छ ।