जेनजी आन्दोलनमा भएको विध्वंसः काठमाडौंमा १ हजारभन्दा बढी सरकारी सवारीसाधन ध्वस्त

काठमाडौं,३१ भाद्र । भदौ २३ र २४ गतेको जेनजी आन्दोलनका क्रममा ठूलो मावीय क्षतिसँगै देशका प्रमुख निकायहरु र संस्थानहरूमा ठूलो क्षति पुर्‍यायो। यस आन्दोलनको क्रममा काठमाडौंमा मात्रै १ हजार ४२ वटा सरकारी सवारीसाधनमा आगजनी भएको प्रारम्भिक तथ्यांकले देखाएको छ। यसमध्ये ४४१ वटा चारपांग्रे र ६०१ वटा दुईपांग्रे सवारीसाधन पूर्ण रूपमा नष्ट भएका छन्। आन्दोलनको क्रममा १९ जनाको मृत्यु भएपछि, उच्चपदस्थ कर्मचारीहरूले सरकारी गाडीहरू सडकमा असुरक्षित हुने भन्दै कार्यालय परिसरमै पार्किङ गर्न निर्देशन दिएका थिए। तर, भदौ २४ गते आन्दोलन थप हिंसात्मक बन्दै सिंहदरबार परिसर भित्र र बाहिरका सरकारी कार्यालयहरूमा तोडफोड, लुटपाट र आगजनी भएको थियो। यस घटनाले सरकारी तथा निजी सम्पत्तिमा ठूलो आर्थिक नोक्सानी पुर्‍याएको छ, जसको पूर्ण विवरण आउन अझै बाँकी छ। गोरखापत्र दैनिकले सार्वजनिक गरेको विवरणअनुसार, सबैभन्दा धेरै क्षति सडक विभागलाई पुगेको छ, जहाँ ६५ वटा चारपांग्रे सवारीसाधन नष्ट भएका छन्।

अन्य प्रमुख निकायहरूमा भएको क्षतिको विवरण यस प्रकार छ
सर्वोच्च अदालतः ५१ वटा चारपांग्रे गाडी र गन्न नसकिने अवस्थामा मोटरसाइकल
सहरी विकास तथा भवन निर्माण विभागः ५० वटा चारपांग्रे गाडी र अनुमानित २०० मोटरसाइकल
प्रधानमन्त्री तथा मन्त्रिपरिषद् कार्यालयः ४७ वटा चारपांग्रे गाडी र ७४ वटा मोटरसाइकल
अर्थ मन्त्रालयः ३६ वटा चारपांग्रे गाडी र ५३ वटा मोटरसाइकल
संघीय मामिला तथा सामान्य प्रशासन मन्त्रालयः ३५ वटा चारपांग्रे गाडी
शिक्षा मन्त्रालयः २६ वटा चारपांग्रे गाडी
गृह मन्त्रालयः २५ वटा चारपांग्रे गाडी
स्वास्थ्य मन्त्रालयः २२ वटा चारपांग्रे गाडी
युवा तथा खेलकुद मन्त्रालयः १९ वटा चारपांग्रे गाडी
संघीय संसद सचिवालयः १८ वटा चारपांग्रे गाडी
उपत्यका ट्राफिक प्रहरी कार्यालयः १८ वटा चारपांग्रे गाडी
वन तथा वातावरण मन्त्रालयः १७ वटा चारपांग्रे गाडी
कृषि तथा पशुपन्छी विकास मन्त्रालयः ९ वटा चारपांग्रे गाडी

यस आन्दोलनले सरकारी भवन र सवारीसाधनमा पुर्‍याएको क्षति नगण्य नभई निकै भयावह रहेको अधिकारीहरूले बताएका छन्। जलेका गाडीहरू अहिले पनि सरकारी कार्यालय परिसरमा देख्न सकिन्छ ।