सार्वजनिक सेवा सुनिश्चितताको माग गर्दै विराटनगरमा र्याली

“सबैका लागि सार्वजनिक सेवा” को माग गर्दै भुमि प्रशासन चोकबाट सुरु भएको र्याली ट्राफिक चोक हुँदै हनुमान मन्दिरसम्म पुगेको थियो । र्यालीमा ट्रेड युनियन, साना किसान, महिला समूह, युवा र अधिकारकर्मीहरुको सहभागिता थियो ।  प्रदर्शनका क्रममा सहभागीहरुले “सबैका लागि सार्वजनिक सेवा, धनीमाथी कर र अवैधपुर्ण ऋण खारेज” को माग गर्ने नारासहितका प्लेकार्ड बोकेका थिए ।

र्यालीपछि आयोजित कार्यशालामा सहभागीहरुले सबैका लागि सार्वजनिक सेवा किन आवश्यक छ? भन्ने विषयमा अन्तरक्रियात्मक छलफल गरेका थिए । कार्यशालामा मानवअधिकार, श्रमिक अधिकार, वातावरणीय न्याय र समानताको सवालमा काम गर्दै आएका युवा, विद्यार्थी, नागरिक समाजका प्रतिनिधि र स्थानीय अगुवाहरूको उपस्थिति थियो ।

कार्यक्रम काठमाण्डौ, पोखरा र विराटनगर गरी तीन शहरमा गरिएको हो । प्रधानमन्त्री केपी शर्मा ओली र विश्वभरका नेतृत्वकर्ताहरु स्पेनको सेविलमा जुन ३० देखि जुलाई ३ सम्म आयोजना हुने चौथो अन्तर्राष्ट्रिय सम्मेलन फाईन्यान्सिङ फर डिभेलोपमेन्टमा भेला हुँदैछन । यो अवसरमा विश्व दक्षिणका आवाजहरू सुन्नैपर्छ भन्ने मागसहित यो अभियान नेपालको काठमाण्डौ, पोखरा र विराटनगर गरी तीन सहरमा सञ्चालन गरिएको हो ।